ریاض (وقار نسیم وامق) سعودی عرب میں موسم ریاض کی رعنائیاں بھرپور انداز کے ساتھ جاری ہیں سعودی انٹرٹینمنٹ اتھارٹی کی جانب سے میوزیکل نائٹ کا اہتمام کیا گیا جس میں فلمسٹار سلمان خان سمیت دیگر فنکاروں کی پرفارمنس دیکھنے کے لئے ہزاروں کی تعداد میں پاکستانی، بھارتی اور سعودی شہریوں نے شرکت کی۔
سعودی عرب کے دارالحکومت ریاض میں سعودی عرب کی جنرل انٹرٹینمنٹ کے زیر اہتمام موسم ریاض کے سیزن ٹو میں فلمی دنیا کے بھائی جان سلمان خان جلوے بکھیرنے پہنچے جہاں ان کے ہمراہ شلپا سیٹھی، پربھو دیوا، سنیل گروور، ،آیوش شرما ،سائی منجیکر، گورو رندھاوا نے اسٹیج پر دھواں دار ہرفارمنس دی جس کو دیکھنے کے لئے ہزاروں کی تعداد میں پاکستانی اورانڈین فینز کے علاوہ سعودی عرب سمیت دیگر خلیجی ممالک کے ہزاروں افراد بھی شریک تھے۔
فنکاروں کی میوزک مستی سے بھری پرفارمنس سے لوگوں نے بھرپور لطف اٹھایا جبکہ نامور کامیڈین سنیل گروور کی کامیڈی نے بھی مسکراہٹوں کے رنگ بکھیرے۔
سلمان خان سمیت دیگر فنکاروں نے سعودی ولی عہد شہزادہ محمد بن سلمان اور سعودی انٹرٹینمنٹ اتھارٹی کے چیرمین ترکی الشیخ کا شکریہ ادا کیا اور کہا کہ انہیں سعودی عرب میں پہلی مرتبہ پرفارم کرکے بہت اچھا لگا اور آئندہ بھی یہ سلسلہ جاری رہے گا۔